Simetrio

December 26, 2011 at 10:44 pm (Uncategorized)

Bone: tri minuti ante nun me sendis ligilo a pre-lasta sendajo a Facebook. Nun, omna membro di grupo “Idisti” (quon me anke kreis hodie) devas recevar la novajo pri la ri-vivigo di ca situo. Me pensis ke esus honesta agado, pro la simetrio, anke anuncar ca nova grupeto hike en WordPress-blogo. Adreso di ca nova grupo esas:

http://www.facebook.com/groups/idisti/

ed omna idisto en la mondo povas libere membreskar ibe. La grupo esas tote apertita – por kombatar posibla spamo, me adjuntis kelka altra personi ad administrantaro. Me kredas ke agante tale, ni povas uzar utileso di Facebook por informar idistaro pri omna interesanta aktivesi. Se ula lektanto di ca blogo ne ja esas membro en ca grupo, esez bonvenanta!

Permalink 1 Comment

Nova kontribuisto a ca blogo

December 26, 2011 at 10:24 pm (Uncategorized)

Se vu esas astonata da nova kontributajo a “La mondo en Ido”, me havas la simpla explanajo. Hike esas me, Johnny, vua nova kontribuisto a ca blogo. Dave, la homo dop existanta sendaji adhike, lasis me kontinuar sua laboro facita kelka yari ante nun per donar a me administanta permisi al situo. Me ne povas promisar frequenta novaji sendita da me, ma la bona kozo esas havar nova kontenaji depos kelka yari di silenco. Me nur esperas ke Dave ipsa skribos kelkafoye ula novaji, ma mem se me duros administrar ca blogo sole, vu havas la chanco lektar ulo.

Previdante vua posibla questioni, mea kara lektanto, me konfiguris WordPress (qua funcionigas la blogo) automatikale sendar artikli kom ligili a nova facebook-pagino quon me anke kreis hodie, nomizita ULI. Se vu memoras, ULI desabreviesas a Uniono por la Linguo Internaciona, ed esas oficala organo ke suportas nia linguo. Me trovas ke esus tote korekte brodkastar novaji di ca blogo ad maxim posibla audantaro. Me ankore ne savas quanta lektanti povas havar ica blogo depos kelka yari sen sendaji, do forsan ula idisto qua esas aktiva che Facebook okazione venas adhike per trans-sendita ligili.

Forsan me devas kurte prizentar su? Me esas viro evanta 36 yari, etnika Rusano de Estonia, vivanta en Sud-Hispania dum lasta du yari. Me esas recente elektita a Direktanta Komitato di ULI e do povas informar vi pri eventi en Idia ante li publikigesos en Progreso, oficala revuo di la Uniono. Me esas informatikisto, e mea interesi inkluzas anke la turismo, plusa lingui, koquado e sana viv-maniero. Se vu lektas ca linei, vu esas bonvenanta komentar, dicante ula vorti pri vu ipsa. Ni esez interkonocata😉

Permalink 2 Comments

Beatbox

May 25, 2006 at 3:17 am (Uncategorized)

Haha, nur kun sua boko!

Permalink Leave a Comment

Turkia en la EU

May 21, 2006 at 4:55 pm (Uncategorized)

Ka la Idistaro esas plu o min suportanta pri Turkia en la EU? En altra forumo (en la Angla) ni nun parolas pri ol, ma la opiniono en Europa esas tote diferanta en altra landi, de Finlando (preske omnu suportas ol) til Austria (preske nulu).

Por me, kande me lektas pri Centrala Azia, la landi di Kazakstan, Uzbekistan edc. me sempre vidas ke Turkia helpas la EU ed Usa kontre Rusia; exemple sen Turkia la petrolo-lineo qua komencis ye 2005 ed iras de la Maro Kaspian a la Mediteranea Maro tra Azerbaijan, Gruzia e Turkia povus esir de la Kaspian, tra Iran e direte a la Golfo Araba. Komprenende me preferas ke ol transiras Azerbaijan – Turkia kam direte tra Iran. Geopolitiale la valuo di Turkia forsan esas nekontestebla, ma pri quale la populo di Europo pensas, me savas nulo. Quale vi pensas?

  • 22 di mayo: Korektigita a 'Mediteranea Maro' 

Permalink 2 Comments

La fortunoza viro

May 19, 2006 at 12:36 am (Uncategorized)

(Averto: Ignorez la unesma 0:30 de la video! Pos 0:30 esas interesanta.)

La fortunoza viro

Ah…ecepte la muziko, qua esas 'ne skribinda pri a sua hemo' (dicajo en la Angla). -_- Lore, 90% fortunoza. Me vidis lu en la televiziono ma me sempre oblivias la nomi di famozi hike…ek li anke 90% esas ne-respektinda nek konocinda…ma vidinda (korpiale).

La kafeerio en qua me ofte studias havas forsan 50% mulieri kun plastika kirurgio (o forsan kirurgieto, la chanji quin li facas hike ne esas tre granda, nur subtila!

Permalink 1 Comment

Pro quo la babileyo ne funcionas?

May 17, 2006 at 4:25 am (Uncategorized)

Pro ke la servilo-kompanio esas mala – subite nova kompanio kompris omna servili di Chatzy ma li ne funcionas bone. Tamen, la kompanio dicis nulo a la klienti:

Chatzy.com has been down for more than a week and we are deeply sorry.

Some time ago, our hosting company (Managed.com) was bought by another hosting provider by the name of WebHostPlus. WebHostPlus wanted to move all Managed.com servers to their location, which, in theory, should only have caused a couple of hours of downtime, had the migration process been carried out professionally.

Unfortunately, it seems that WebHostPlus is not a very professional company. On May 6, our server was taken offline and our harddisks were apparently moved to the new location. Since then WebHostPlus has been having great difficult getting us – and a lot of other web sites – online again.

We are deeply sorry for this disturbance in our service. We are doing everything we can (which unfortunately is not much since we are highly dependent on our hosting provider) to get Chatzy up and running again. Once Chatzy is back, we will take appropriate measures to assure that down-time like this will not happen again.

If you wish, you can read how we and a lot of other fustrated webmasters complain here:
http://www.webhostingtalk.com/showthread.php?t=508358

Do, forsan kelka dii pose (o un o du semani) la babileyo funcionos itere.

Dum ke vartas ni videz reklamo kun Koreana mulieri.

Permalink Leave a Comment

Nova Ido-Koreana vortaro

May 15, 2006 at 12:08 pm (Uncategorized)

Semblas ke esas nova Ido-Koreana vortaro:

http://es.geocities.com/kanaria1973/dicidokoreana.html

Tamen, esas kelka erori: 주요한 페이지에 가십시요 –> 대문으로 가기

편지에 고속 접근 –> ABC순으로 빨리 찾기

Me anke facis Ido-Koreana vortaro un yaro ante nun:

http://www.geocities.com/dave5dave5dave/vortaro2.html

Anke, la vorto Ido esas 이도 en la Koreana.

Adavane!

20878-1.jpg

Permalink Leave a Comment

Nova frontispico

May 14, 2006 at 5:26 am (Uncategorized)

Hiere me chanjis la frontispico en Ido aden formo multe plu bela, kun 'artiklo di la monato' e 'kunlaborajo di la monato' en la unesma pagino.

http://io.wikipedia.org/wiki/Frontispico

e komparez a la antea:

http://io.wikipedia.org/w/index.php?title=Frontispico&oldid=39074 

Ad'ube la nova pagino venis? De la Greka

Permalink Leave a Comment

Korektigez mea nova artiklo!

May 13, 2006 at 5:03 am (Uncategorized)

Ol esas tre longa e me forsan bezonas korektig, pro ke me tradukis ol tre rapide e pri kelka vorti me ne savis. E la vorto oral sex? Me selektis bokala sexuo, pro ke la vorto en la Dyer Dicionario por 'oral' esas 'parola', ma to esas vere diferanta kozo ka no? 'Parola sexuo', hahaha. Prostitucar – prostituco, prostitucado, prostitutato, edc. edc. La viro esas lo prostitucanta e la muliero esas lo prostitucata, forsan? En la diala vivo preske omna prostitucas su ipsa per la kambio di libereso e tempo por pekunio. Do, artiklo pri prostitucado esas artiklo pri ni ipsa, nur en plu videbla formo.

Korektigez mea erori, danko! 

http://io.wikipedia.org/wiki/Prostitucado_en_la_Populala_Republiko_di_Chinia 

Prostitucado en la Populala Republiko di Chinia

From Wikipedia

Jump to: navigation, search

Voyala prostitucati en la drinkerio-distrikto di Sanlitun en Beijing.

Grandigar

Voyala prostitucati en la drinkerio-distrikto di Sanlitun en Beijing.

Quik pos obtenar povo ye 1949, la Komunisto Partiso di Chinia komencis kampanii qui pretentande removis prostitucado de la kontinento finante ye la frua 1960a yari. Depos la laxigo di la guvernerio pri societo dum la frua 1980a yari, prostitucado en Chinia ne nur ri-aparis, ma nun trovesas tra omna urbala e rurala loki. Malgre la esforci di la guvernerio, prostitucado developis tante multe ke ol nun esas sua propra industrio, kun granda nombro di personi e facante granda ekonomiala produktado. Prostitucado divenabas anke asociita kun numbroza problemi, inkluzante krimino organizita, guverneriala koruptado, e sexuale transmisita morbi.

Aktiveso en Chinia relatante a prostitucado havas multa tipi, loki, e preci. Vendanti di la sexuo venas de multa rangi di la societo. Li preske omna esas mulieri, tamen recente virala prostitucati aparis. Tipala loki inkluzas hoteli, karaoke-erii e beleso-saloni.

Malgre ke la guvernerio di Chinia omnatempe esis serioza pri ti qui aranjas la krimo di prostitucado, pri la traktado di la prostitucato ipsa ol ulatempe traktas ol kom krimo, ed ulatempe traktas ol kom mala konduto. Depos la ri-aparo di prostitucado dum la 1980a yari, la guvernerio unesme uzis la legala sistemo, to esas, la diala operaciono di la korti e polico. Duesme, li uzis kampanii duktita da la policistaro, kun periodi di intensa publika exameno kom sociala diciplino. Malgre la suporto por legigar la sexuo-industrio da internaciona NGO-i ed exterlandana komenteri, esas preske nula suporto por to de la publiko, sociala organizi, o la guvernerio di Chinia.

Indexo

[celar]

//

[editar]

Prostitucado dum la tempo di Mao

"Re-edukado" centro en antea prostituceyo en Beijing, 1949.

Grandigar

"Re-edukado" centro en antea prostituceyo en Beijing, 1949.

Pos la vinko di la Komunista Partiso di Chinia ye 1949, lokala guvurnerii havis la tasko eliminar prostitucado. Un monato pos la Komunismigo di Beijing ye 3 di februaro 1949, la nova urbala guvernerio sub Ye Jianying anuncis projeto por regular la multa prostituceyi di la urbo. Ye 21 di novembro, omna ek la 224 prostituceyi en Beijing klozesis; 1286 prostitucati e 434 proprietanti, kompranti, e proxeneti arestesis dum nur 12 hori per aproxime 2400 kadri.[1] Ne-surprizante, la kampanio di Beijing celebresis en la historiala rakonti di la lando. La rapida e drastika metodi montris nacionala exemplo pri la politikala rezolvo e habileso di la nova guvernerio.

Pro la grandeso di sociala problemi qui mustis esar rezolvita, e la manko di pekunio e moyeni di la regionala guvernerii, la maxim multa ek la urbi di Chinia adoptis la plu lenta metodo di unesme regular e pose interdikar prostitucado. [2] Ica metodo uzesis en Tianjin, Shanghai e Wuhan.[3] Tipikale ol unesme uzis sistemo di guverneriala administrado qua regulis la aktiveso di prostituceyi e senkurajigis virala kompreri. Ol eventuale mikrigis la nombro di prostituceyi en singla urbi, e pose "Beijing-ala" klozado uzesis, e depos "ri-edukato" komencis. Ri-edukado programi uzesis plu multe en Shanghai, en qua la nombro di laboristi en la sexuo-industrio kreskis til 100,000 pos la Duesma Chinia-Japonia Milito.

Ye la frua 1960a yari, tala metodi preske abolisis videbla prostitucado de Chinia. Segun la guvernerio, morbi relatante a la sexuo esis preske abolisita kun la represo di prostitucado. Por celebrar ta vinko, omna 29 inquesto-instituti pri ta morbi klozesis ye 1964.

Segun la teorio di Marxismo, mulieri qui venas sexuo esis vidata kom ti qui havas nula altra alternativo por trans-vivar. Tamaniere la eliminado di prostitucado esis montrata kom un ek la majora verik di la komunista guvernerio ed evidenco pri la vereso di Chiniana Marxismo. [4] La subjekto di prostitucado ne existis en Chinia serioze dum plu kam 30 yari. Recenta inquesti montris, tamen, ke la desaparo di prostitucado en la guvernerio di Mao vere ne esis kompleta. [5] Pan Suiming, un ek la maxim savoza experti pri prostitucado en Chinia, argumentas ke "ne-videbla" prostitucado — en la formo di mulieri donante sexuala favori po certa privileji — divenis partikulara traito di Chinia sub Mao, partikulare ye la fino di la Kulturala Revoluciono. [6]

[editar]

Prostitucado pos 1978

Aresti relatante a prostitucado dum policala kampanii(1983-1999)
1983 46,534
1989-90 243,183
1996-7 aprox. 250,000
1998 189,972
1999 216,660

La retroveno di prostitucado en Chinia venis samatempe kun la introdukto di reformi di la ekonomio di Deng Xiaopeng ye 1978. Segun la ne-kompleta statistiki bazita a nacionala kampanii, la proporciono di prostitucado kreskas omnayare de 1982. [7] Inter 1989 e 1990, 243,183 personi arestesis pro prostitucado-relatanta aktivesi. [8] Zhang Ping kalkulas ke ta nombri de la polico montras nur 25-30 procento de omna personi qui esis implikata. [9] Prostitucado esas grandeskante parto di la ekonomio di Chinia, employante forsan 10 milion personi, kun posibla yarala konsumado di 1 trilion RMB. [10] Pos policala kampanio ye 2000, Chiniana ekonomisto Yang Fan kalkulis ke la integra nacionala produktajo (GDP) di Chinia mikreskis 1% kun la mikresko di spendaso di la subite ne-employata muliera prostitucati. [11]

La ri-vivo di prostitucado unesme eventis en la esta, rivala urbi di Chinia, ma depos la 1990a yari prostitucado esis en altra ne-developita regioni, exemplo Guizhou, Yunnan, e Tibet. [12] Dum la 1980a yari, la tipala vendisti di la sexuo esis yuna, rurala muliero sen multa edukado de populoza, relative fora provinci exemple Sichuan e Hunan. Dum la veninta yar-deko esabas agnosko ke la maxim multa ek li qui eniras prostitucado facas tale per sua propra motivi. [13] La posibla profiti de prostitucado kun altra formo di employado inkluzas plu multa uzebla pekunio, aceso a plu alta sociala cirkli, ed altra selektado en sua vivo. La nacion-regulizita jurnalistaro raportas maxim multe pri urbala rezidanti qui prostitucas, especiale mulieri kun edukado de universitato. [14] Semblas ke esas anke kreskante aceptado di prostitucado. En inquesto ye 1997, 46.8% di studenti en Beijing agnoskis kontemplir recevar la servico di prostitucati. [15] Esas posibla ke la demando di prostitucado venas anke de la antea reguli di la "un puero programo", qua produktis plu multa viri kam mulieri. [16]

Prostitucado ofte esas kunligita kun basa-nivelo korupto di la guvernerio. Multa regionala oficisti kredas ke la prostitucado en la operado di komerco adportas ekonomiala avantaji per developar turismo ed altra industrii, e per krear signifikanta revenuo de imposto. [17] Ulatempe, mem la policistaro arestesis pro direktar alta-nivelo hoteli en qua prostitucado existas, o pro aceptar subornajo e sexuala donacaji por ignorar la existo di prostitucado. [18]

Kreskanta numbor di mulieri qui vendas sexuo esis atentata, o mem mortigata kande on probas furtar lia pekunio o proprajo.[19]

[editar]

Tipi e loki

La polico di Chinia kategoriigas prostitucado en sistemo kun sep niveli, tamen existas altra formi qui ne aplikesas en la sep. [20] Ica niveli montras la multa tipi di prostitucado e prostitucati. Malgre ke li omna esas klasifikata kom prostitucati, la servici quin li ofras povas esas tre diferanta. En ula niveli, exemple, esas ankore repugneso pri anusala sexuo e bokala sexuo. Kun ta vasta tipi di prostitucati, la vira kompristi anke havas diferanta historii.

La unesma nivelo, savata kom baoernai (包二奶), referas pri mulieri qui kondutas su quale "duesma spozini" di viri kun pekunio ed influo, inkluzante guvernerio ed aferisti de Chinia, ed anke aferisti exterlandala. Ica aktivo esas klasifikata kom prostitucado pro ke ta mulieri aktive serchar por viri qui povas donar a li lojeyi e sua propra salario. Ta mulieri ulatempe kun-lojas kun la "kliento" e forsan mem volas divenar vera spozo di lu.

La duesma nivelo, baopo (包婆: "pakigita spozino"), referas a mulieri qui recevas alta-nivela klienti dum periodo decidita, exemple dum voyajo por aferi, e recevas pekunio decidita pro facar tale. La unesma e duesma niveli recente divenis la centro di multa debato pro sua interrelato kun guverneriala koruptado. Multa komentisti kredas e dicas ke ica aktivi montras la expreso di mulieri di sua borgezala yuro. [21] La All-China Women's Federation, kom un ek la majora korpi di feminismo en Chinia ed anke por grupi di mulieri en Hong Kong e Taiwan, esabas aktiva en sua esforci por extirpar ica formo di "konkubeso", kom aktivi qui violacar la kontrakto di mariajo. [22]

La triesma nivelo, santing (三厅: "tri salonegi"), referas a mulieri qui havas sexuala aktiveso kun viri en loki por karaoke e dancado, drinkerii, restorerii, teo-domi, ed altra loki en qua li recevas sua salario en la formo di gratifikuri de la individuala viri kun qua li iras, ed anke de la pekunio qua venas de servico-gratifiketo en ta loki por drinkajo e manjajo. Ofte-uzata vorti por ta mulieri esas sanpei xiaojie (三陪小姐: "mulieri di la tri akompani"). Ica mulieri ofte komencas kun lasar la viri karezar sua korpi, e se la kliento volas, kun sexuala relati.

prostitucati di la meza nivelo arestita en Shenzhen. Tala imaji esas ofte videbla dum la kampanii di la polico.

Grandigar

prostitucati di la meza nivelo arestita en Shenzhen. Tala imaji esas ofte videbla dum la kampanii di la polico.

La quaresma nivelo referas a mulieri qui ofte nomesas pordo-klodo mulieri (叮咚小姐: "dingdong mulieri"), to esas, mulieri qui telefonas posibla vendisti di sexuo por solicitar li en certa hotelo. La ago di li esas unfoye sexuagar o sexuago kontinue dum la nokto, la duesma esante du o tri-foye plu precoza.

La kinesma nivelo, falangmei (发廊妹: "fratini di hararo-salono"), referas a mulieri qui laboras en loki qui ofras komercala sexuala servici sub la aspekto di masajo, saneso o beleso-centri, sauni, edc. Agado en ta loki inkluzas masturbado e bokala sexuo.

La maxim basa du niveli havas plu direte kambio di pekunio por sexuo o donacaji. Ta du niveli havas nula relato a guverneriala korupto, nek tra la nova komercala sektoro en Chinia. La sisesma nivelo, jienü (街女: "mulieri de la strado"), referas a mulieri qui solicitas maskula kompristi di sexuo en la stradi.

La sepesma e maxim basa nivelo, xiagongpeng (下工棚: "en la laboreyo"), referas a mulieri qui vendas la sexuo a rurala laboristi. Mulieri qui vendas la sexuo precipue facas tale por mikra quanti di pekunio, manjajo e shirmilo.

[editar]

Legala respondi

Lego pri prostitucado

  • 1987 Sekureso administrado punisado reguli (中华人民共和国治安管理处罚条例).
  • 1991 Decido pri strikte interdiktar la komprado e vendajo di la sexuo (严禁卖淫嫖娼的决定).
  • 1991 Decidi pri severa puniso di krimini qui forraptas e komercas mulieri o pueri(严惩拐卖、绑架妇女、儿童的犯罪分子的决定).
  • 1992 Lego por protektar la yuri ed interesi di mulieri (妇女权益保障法).
  • 1997 revizo di la kriminala lego di Chinia (中华人民共和国刑法).
  • 1999 "Reguli koncerne la direktado di publika loki di amuzo" (娱乐场所管理条例).

La legi di Chinia dicas ke prostitucado ne esas simpla kambio inter individui, e ke ol esas serioza violaco di civila yuri. La respondado a prostitucado esas punisar ti qui organizas prostitucado.

[editar]

Lego pri prostitucado

La maxim videbla formo di polico esas sua kampanii. Kontre-prostiticado kampanii ofte havas nacionala konkurenci di la jurnalistaro por montrar la legi e reguli di Chinia. Pose on ofte vidas anunci pri statistiki di la nombro arestita, ed aserti ke la lukto kontre prostitucado esos tre longa. La uzado di kampanii ofte kritikesis por uzar anciena "ideologiala" konstruktajo, ed anke anciena metodo por la kampanio simile a la 1950a yari. [23]

Permalink Leave a Comment

Wikivortaro

May 12, 2006 at 6:52 am (Uncategorized)

Nia Wikivortaro havas preske 50,000 vorti! To esas la 4ma granda Wikivortaro en la mondo. Anke, la 1ma (Franca) e la 3ma (Chiniana) uzis roboto por adkargar multa vorti duminstante, do en Wikivortari sen roboti la nia esas la 2ma granda.

Yen nia laboremeso!

12 May 2006

Permalink Leave a Comment

Next page »